معلش بقى استحملونى هو موضوع غريب شوية واحتمال متلقوش كلام تردوا مش مهم .. بس لو متكلمتش احتمال اتجنن ))
الواحد حياته بقت عبارة عن روتين والروتين بقى ملل والملل بقى زهق والحمد لله الزهق اصبح اكتئاب والاكتئاب ادى للانطوائية ماشاء الله يعنى
انا مثلا من ساعة ما خدت الاجازة وانا مش بعمل اى حاجة فى الحياة غير انى بصحى اقعد عالكمبيوتر وانام واصحى عالكمبيوتر وانام واصحى تانى عالكمبيوتر وهى دايرة مش شيفالها اخر ..
زهقت قولت اجيب قصص اللي عندي واقعد اتسلى فيهم والله العظيم مليا نفس اقرا كلمة واحدة
حتى النوم الواحد زهق منه .. وبقى5 ساعات بالكتير وخلاص كأنه حاجة لازم تتعمل وخلاص
دى مش مشكلة .. المشكلة بقى ان حتى اننا نغير الروتين ده مش عايزين..
لا هو عاجبنا ولا عايزين نغيره..
يعنى مثلا واحدة صحبتى تكلمنى تعالى ننزل بخترع اى حجة انى منزلش مع انى فاضية ومش ورايا اى حاجة
حتى الكلام الواحد مبقاش عايز يتكلم .. ومش مش عايز بس لا مش عارف اصلا .. ماما تكلمنى طيب حاضر ماشى اوكى..
مش عايزة اقعد مع حد ولا اكلم حد .. واى كلمة مابصدق امسك فيها وادخل اعيط واحسسهم بالذنب
مع ان اعتقد ان اللى انا بعمله ده هو مش اكتر انى بكون فعلا محتاجة انى اعيط فاى حاجة باخدها حجة لكدا
ساعات كتير بكون قاعدة مع صحابى وكأنى قاعدة غصب عنى لا بتكلم ولا عارفة اتكلم ولا عايزة اتكلم ..
حتى الاميل والنت .. برضو اتخنقت منهموبرضو حاسة انى بقيت رخمة اوى فى كلامى يعنى هاى اوك ماشى حاضر تمام الحمد لله باى ..
المنتدى تقريبا مبردش خالص .. بقراه المواضيع وبكتفى بكدا ..ساعات كتير ببقى عايزة ارد على مواضيع بس مليش مزاج او حاسة انى هقول كلام قولته قبل كدا او متعاد وملوش لازمة
بعكس ايام الدراسة اللى مش بكون عندى وقت فيها خالص .. برضو لازم ادخل عالنت وافتح الاميل والرغى يحلى ..
ولازم ارد على تلت تربع مواضيع المنتدى هنا .. اقعد ارغى مع صحابى لحد مايزهقوا منى
بنام براحتى جدا وكأن النوم د شىء مقدس .. واصحى اتفرج عالتليفزيون اللى من ساعة الاجازة وانا والله ماجيت نحيته ولا قربتله
والواحد يبقى مش طايق انه يمسك كتاب ولا قلم .. بعكس دلوقتى تماما
المختصر المفيد فى الاجازة بتعملوا ايه ؟؟ انتوا كمان حاسين بالروتين والملل ده ولا انا بس اللى كدا ؟؟
عمركوا حسيتوا ان ملكوش نفس تعملوا اى حاجة فى الدنيا غير انكوا تقعدوا كده مع نفسكوا ساكتين