القلب إللى داق حب ربنا.. يعرف يبقى فى قلبه من حد تانى ذره غل أو حقد.. ..
أنا نفسى بس أوصل لكم فكرتى ..
أنا عايز أقول..
ليه حياتنا كلها ماتكونش حب.. بكل صور هذه الحب..
بتحب حتى ورقه الشجر لأنها من مخلوقات الله.. بتحب النمله إللى ماشيه فى ضعف.. لأنها من مخلوقات الله.. بتحب الهواء.. بتحب كل حاجة ..
ليه مانحبش بعض.. ليه القلوب مش صافيه..
ليه كل واحد بيدور على مصلحته.. و ينسى مصالح الناس.. ليه الإبتسامه مش مشرقه.. ليه مخبيه تحتها كم من الأحقاد..
طيب الحمدلله لو كل قلوبنا مش كده..
طيب ممكن أسالكم سؤال كمان ..
ليه حتى لما بنشوف واحد عاصى..بنلاقى كم من الكره تجاهه.. و كم من الحقد..
يااه..... أنسيتم قول الله تعالى.. " كذلك كنتم من قبل فمن الله عليكم"..و قوله تعالى.. "يَمُنُّونَ عَلَيْكَ أَنْ أَسْلَمُوا قُلْ لا تَمُنُّوا عَلَيَّ إِسْلامَكُمْ بَلِ اللَّهُ يَمُنُّ عَلَيْكُمْ أَنْ هَدَاكُمْ لِلْإِيمَانِ إِنْ كُنْتُمْ صَادِقِينَ "يااه.. للدرجه دى أصبحنا فى هذا السوء....
دا كل إللى أحنا فيه دا فضل من الله فقط و من منه.. و ليس لك فى الأمر من شىء..
ليه مش من حبنا لربنا نحب العاصى دا.. نخشى عليه من غضب ربنا.. نساعده..
و ماتقولوليش مساعده و أنت قلبك ماليان تجاهه.. بكم من الكره..
مهما كان كلامك حلو.. و طريقتك جميله..
عارفين أجمل كلام بيبقى إية.. دايما إللى بيبقى من القلب..
عارفين ليه..
لأنه بيصل للقلب..من القلب للقلب..
لو أنت حاسس قد إية صاحبك الضايع ده... و ماشى فى طريق وحش أوى.. و أنت بتحبه بجد عايز ربنا يهديه..
كلمه.. بس مش بس بلسانك.. بقلبك قبل أى حاجه..
ممكن تقول كلام مش مترتب..ممكن تقول كلام مش منطقى.. بس من قلبك.. فحيوصل له أحلى من ألف خطبه سمعها من أعظم الشيوخ..
يااه لما قلبك بيبقى بيحب بجد.... لما يبقى مايعرفش معنى لكلمه كره.. مش فى قاموسه أصلا..
حتى لو أتعمل فيك مقالب.. و أضحك عليك.. فقط تدعى لمن فعل فيك ذلك بالهدايه..
أنت مسلم..أنتى مسلمه..
عارفين معنى جميل أوى بحسه فى هذه الكلمه..
أنت مسلم قلبك ...كله.. بكل خليه فيه لحب الله.. و بترجم حبك فى حب كل الناس...
عارفين..
أحنا بنحب الأطفال ليه..
علشان هما عالفطره.. علشان قلبهم مايعرفش يقول غير إللى بيحس بيه.. لما تلاقيه بيحب بيجرى عليك و يبوسك و يقولك بحبك..مايعرفش يقول غير بحبك لأنه بيحبك..
زعلان منك... بيقولك انا زعلان.. مايعرفش يكدب و لا ينافق.. مايعرفش يخدع.. قلبه صافى.. شفاف.. عنده شفافيه..
ليه.. علشان هو لسه عالفطره..
لسه ماتلوثش بالدنيا و معاصيها..
أتمنى من خلال موضوعى دا..
نعمل وقفه مع النفس..
و نتعلم بجد نحب الناس..
و نتعلم لغه جميله أوى..
أهم من أى لغه.. اسمها "لغه القلوب"
[/center][/b][/b][/center]
فارس القلب الحزين عضو متميز جداً
عدد الرسائل : 2371 العمر : 37 تاريخ التسجيل : 06/10/2007
جزاكم الله خيرا موضوع رائع بجد وانا هبدأ بنفسى وافكر فى قلبى ولغة قلوب الناس الى حواليه لان اجمل حاجه فى الدنيا انك تحب والناس تحبك والرسول صلى الله عليه وسلم بيقول تهادوا تحابوا لان الحب نفسه هدف سامى