(......)ياشعب الكلام

(....) يا شعب الكلام
www.gam3aonline.com


ملحوظة إذا كنت من هواة دفن رؤوسهم في الرمال فلا تقرأ هذا المقال .



يقول الشاعر السعودي في القصيدة التي فصل بسببها رئيس تحرير جريدة عكاظ السعودية من منصبه :



يا بلد أصبح على الكون عالة

يا بلد يصدر صابون ويستورد زبالة

يا بلد يا عربي يا محترم جدا وهو مش محترم

يا بلد راغب علامة ونجوى كرم



ويقول أيضا :



(...) يا شعب الكلام

(...) يا شعب السلام

(...) يا شعب نسى يبكي على الدرة

وما نسى يضحك مع عادل إمام



لعل أجمل بيت أو شطر في هذا الشعر هو الشطر الذي يقول فيه طز يا شعب الكلام .ربما لأنه لامس جرح قديم جديد



طول عمري من وأنا صغير– وأظن أنكم أيضا مثلي - اسمع الناس من حوالي يقولوا الإسلام في مصر وبس المصريين اكتر ناس متدينين في العالم كله..... وهما وبس اللي عندهم تدين وإلتزام وإيمان ...ولإثبات التفوق المصري فيجب عليك ان ترمي الآخرين باتهامات الفسوق والفجور والشذوذ .



أمس تذكرت هذا كله وهذه النعرة الكذابة اللي فينا وصديقنا في موقع جامعة أون لاين ( خالد عمر ) يعرفني على موقع جوجل ترندس http://www.google.com/trends



وهذا الموقع كل ما عليك ان تضع في خانة البحث الكلمة ليخرج لك الموقع رسم بياني عن أكثر من يبحثون على الإنترنت عن هذه الكلمة على ثلاث نطاقات ....أكثر مدينة يبحث اهلها عن هذه الكلمة ...أكثر بلد ...أكثر ناطقين بلغة معينة .



المهم وبعد عدة كلمات تفتق ذهني ان اضع كلمة sex لأرى أي شعوب اكثر بحثا عن هذه الكلمة في العالم ...وكانت النتيجة المرعبة .



القاهرة أكثر المدن في العالم يبحث اهلها عن كلمة sex و بتفوق واضح وكبير جدا على من بعدها



مصر ثاني اكثر الدول في العالم بحثاً عن كلمة sex بفارق بسيط للغاية وضئيل جدا عن باكستان

اللغة العربية ناطقوها هم ثاني اكثر من يبحثون عن كلمة sex في العالم كله .



أخيه أخيه إحنا اكبر شعب بيدور على المواقع الجنسية والصور الجنسية في العالم ؟؟ إخيه إخيه على الكلام اللي فضلنا ننفخ بيه في نفسنا والكذب اللي كذبناه وصدقنا نفسنا .

احنا انكشفنا فعلا وانفضحنا .



مش بالذمة يبقى نتلم وننكسف على دمنا وعيب علينا بقى ...يبقى كفاية النعرة الكذابة اللي فينا دي ...ونعرف حقيقتنا ...للأسف مفيش مواقع بتعرف حجم الطيبة ولا بتعرف حجم الذكاء ولا حجم التقدم ولا الحضارة لكن الشواهد واضحة ومش محتاجة تثبت إننا بنكذب على نفسنا .





بلاش بقى نقول إننا اكتر شعب فيه إسلام لأن أكتر شعب فيه إسلام مش حتكون قنوات الفيديو كليبات العريانة هي القنوات الوحيدة اللي شغالة على القهاوي في كل حتة ...بلاش نقول كده لأن البانفليتات والبارشوليتات السياحية اللي بتتكلم عن مصر واللي بتتوزع في اوربا وامريكا أصبح فيها دلوقتي تحذيرات من التعرض للتحرش الجنسي في مصر بكثرة ...بلاش نقول اننا شعب متدين والحشيش بقى في كل شارع وفي كل حارة وركن وبقى زي اللب من كتر انتشاره .





بلاش بقى نقول إننا اطيب شعب لأننا فعلا شعب مش طيب ومستعدين ناكل بعض علشان ربع جنيه وشعب بيستغل بعضه ..سواق الميكروباص بيستغل فيه الركاب وموظف الحكومة بيستغل المواطنين وما يمشيش غير بالرشوة والمدرس بيستغل الطلبة علشان ياخدوا دروس خصوصية والدكتور بيستغل المريض علشان يعمل شغل والمدير متحكم في الموظقين عنده واصحاب الأعمال ما بيدوش العمال حقوقهم وهمهم ان كروشهم تكبر ويرموا الفتات للعمال .شوفوا المطاوي والسيوف والسنج اللي بقت وسيلة أنك تاخد حقك في البلد دي



بلاش نقول إننا شعب متقدم وبيصنع المعجزات ونتهم دول الخليج إنهم بقر بصوا على دبي بقى شكلها إيه وبقت قمة الحضارة والتطور والتكنلوجيا بقت تالت مكان سياحي في العالم ...بينما نقع نحن في ذي قائمة الدول الجاذبة للسياح .





الشعب ده لو عايز يتطور بجد ...عايز يفوق بجد ...يبقى لازم يصارح نفسه بالحقيقة ...إحنا شعب وحش ..آه شعب وحش ..عندنا انحراف ديني واخلاقي ..عندنا تخلف وتأخر منبعه أحنا ..وأهم من ده كله لازم نعترف إننا عندنا نعرة كذابة وفشخرة على الفاضي .



لو ما اعترفناش بحقيقتنا لو ما اقتنعناش إن تشخيص الداء هو نصف الدواء ....يبقى إحنا اللي بوظنا بلدنا وضيعناها .



انا آسف اني ممكن بكون بستخدم لهجة غير لائقة او بتكلم بنرفزة لكن نتيجة البحث في جوجل تريند حطمتني فعلا ..حسستني ان الخير بيضيع من البلد دي يوم بعد يوم .



أنا آسف لو بتكلم بعنف وحدة لكن انا بقيت ماشي في الشارع مخنوق بقيت حاسس إن الناس في عنيها عدوانية ..في عنيها كراهية ..وبغضاء وحقد وفي عنيها حزن وانكسار وجبن وخوق



أنا فعلا آسف لو ضايقت حد منكم لكني لو ضايقت حد منكم يبقى ضايقته من منطلق يا بخت من بكاني وبكى عليّ ولا ضحكني وضحك عليّ







__________________