2020.03.2018:04:17
مسرحية
الطبلة خاوية
تأليف أحمد لبكيري
مشهد لامتحانات الفن المسرحي السنة الثانية مسرح مغربي
مشهد لخبيرة وابنة عمها امسيعيدة اللتان تعيشان في منزل واحد ضمن عائلتين
المشهد 1
خبيرة : قربوا للهنا يا الخوت ..قربوا اتسمعوا كلام الخير من عند خبيرة ومسيعيدة
مسيعيدة : لا اتسمعوا كلام من حد يكفي اتشوفوا الحركة والقلدة وانتما اتفهموا
خبيرة : كلامها ..معقول ..ولكن الكلمة يا ناس مدلولها وافي ..واسطورها لونهم صافي مجبدين ومقادين بالقوافي ..أو..
مسيعيدة : إيوا صافي ..ا
خبيرة : ما صافي والوا ..
مسيعيدة : لا ..يا جماعة الخير ..شوفوا آش كلنا على الحركة ..
خبيرة : آش كلنا ..؟
مسيعيدة : كلنا الحركة بركة ..واللي زاد وسع الكارة يوساع رزقو ..وتدور عندو الحركة ..
خبيرة : هذا تخربيق وزفوط ..واش الرزق بيد العبد ..؟ الرزق مولانا اللي خافيه..كلها ورزقوا حتى فالهرماكة..( ضحك)
مسيعيدة : إيوا ملي هي مخفية ..يعلم الله آش من قتلة ديال العصا غادي تاكل اليوم ..(ضحك)
خبيرة : ياك أ مسيعيدة ..ا ولينا غادين انضاربوا ..ياك ..؟
الجماعة : أ الحلايقية فرجونا الله يخليكم ..ولكن يلا مدابزة ..راحنا عندنا خدمتنا وشغلنا ..
خبيرة : واخا أسيادنا ..كان يا ما كان ..واحد الحمقة شوية مضيق ليها العقل . (تضحك)
مسيعيدة : وكان حتى كان الحبق والسوسان ..كانت واحد الخفيفة ..كتطير مع الطيور ..الساعة زلكة من فوق السور ..(تضحك..وتجلس)
خبيرة : ..اللي قرب شوية يقرب من الجنة ..واللي زلك جا على عين كفاه ..أما الحمق تمة بق مقرد ..الناس تخدم وتجري وتجاري ..وهو مسكين ما عالم ما داري ..لا آش واقع ..لا آ ش طاري ..( ضحك)
1
مسيعيدة : يطرا اللي بغي طرا ..مللي اللبيب ولا مع الحمقى ..أسيدي سالينا كاع هذه الحلقة ..يالله اللي عندو شي شغل يمشي ليه ..
خبيرة : صبورا حتى اتعرفوا الحقيقة ..يلا اتفرقات هذه الحلقة ما دينا والوا .. واللي ما دا ما جاب ..ما فيه فائدة ما يسال جواب..
مسيعيدة : (تقوم) الحكاية وما فيها ياناس ..قصة مشقوف مزوج بمشقوفة (ضحك)
خبيرة : زوينة عندك هذه مشقوف ومشقوفة ..منين ضبرتي عليها ..؟
مسيعيدة : ضبرت عليها من عند الكنس اللي كيشبه ليك ..(تلبس مسيعيدة لباس مشقوف وهي تحكي )
كيف كلنا ياناس مشقوف مسكين معذب مع مشقوفة ..وفواحد النهار ..
مشقوفة : الله يا ربي الله ..الله ..؟
مشقوف : ( يدخل ) مالك أمشقوفة ..ياك لاباس..؟
مشقوفة : ماتت مسكينة ..
مشقوف : شكون هذه اللي ماتت ..؟ يا هذه المراة ..
مشقوفة : الدجاحة ..مسكينة ماتت ..الله يا ربي الله ..الله ..
مشقوف : إوا ولا ماتت ..أش وقع كاع ..؟
مشقوفة : ما وقع والو ..ياك ..علاه هذاك البيض شكون غاذي يفقصو ..؟
مشقوف : المهم ..درتي شي غذاء ولا والو..؟
مشقوفة : واش أنت هبيل ولا مالك ..حنا عندنا الكنازة وأنت كتكول لي الغذاء ..
مشقوف : راه أنا اللي عندي الكنازة فهذه الدار ..وخاصني نتخلص منها ..
(يتبعها فتهرب ..ثم يرجع ويخاطب الجمهور)
مشقوف : إيوا دابا..الدجاجة ماتت ..ومشقوفة خوات الدار ..والغذا أشنو انعملوا فيه ..؟ والبيض بق بلا تفقاص ..المهم لخبار راها في راسكم ( يخرج )
النهــــــاية
2020-03-20, 7:06 pm
